 |
| Mwalimu Oscar Samba |
Uhali gani
mpenwa mwenzangu katika Bwana? Natumai u buheri wa afya.
Leo
nimekuandalia ujumbe mahususi kwa ajili ya kukujuza ukubwa na Uweza wa Yesu
Kristo katika mambo yaliyoonekana ni magumu kama mlima ama bahari katika maisha
yako.
Ni kweli
hitaji ama jambo lilopo mbele yako ni kubwa kuliko wewe na hata mimi mwenyewe
ni kweli siliwezi, ila Yesu tunayemuamini analiweza. Amini tuu kama alivyomwambia
dada yake na Lazaro rafiki yake kuwa anapaswa kuamini tu.
Wana wa
Iziraeli walikutana na mambo kadha wa kadhaa katika maisha yao ya kisafari
na kimakazi ila walimtazama Yesu aliye
Bingwa wa mambo yaliyoshindikana na alifanya njia katika hayo yote.
1. Bahari ya Shamu, Hili lilikuwa ni
jaribu kubwa sana kwa Wana wa Iziraeli ila Mungu hakuwaacha maana Mungu wetu
huwa na sifa ya kutupigania kila uchwao.
Kutoka 14:13 Musa akawaambia watu, “Msiogope! Simameni
tu, mkauone wokovu wa Bwana atakao wafanyia leo; kwa maana hao Wamisiri
mliowaona leo hamtawaona tena milele.14 Bwana atawapigania ninyi, nanyi
mtanyamaza kimiya”
Nami kwa imani iliyo kuu ninakwambia ya kwamba
usikate tama wala usirudi nyuma bali simama kwa imani iliyo kuu nawe itauona
mkono wa Bwana katika hilo jambo lako kwani Mungu huyu aliyetajwa na Musa hapa
ndiye tunayemwabudu na kulitaja jina lake.
Tuangaliye
kilichotokea, Kutoka 14:21 Musa
akanyoosha mkono wake juu ya bahari. Bwana akaifanya bahari irudi nyuma kwa
upepo wa nguvu utokao mashariki, usiku kucha, akaifanya bahari kuwa nchi kavu,
maji yakagawanyika. 22 Wana wa Iziraeli wakaenda ndani ya bahari katika nchi
kavu; nayo maji yalikuwa ukuta kwao mkono wa kuume, na mkono wa kushoto.
Huyu
Mungu wetu sio wa kawaida wala uweza wake haufananishwi na jambo lolote lile
maishani kwani ni Mungu muweza na mwenye mamlaka ya hali ya juu iwezayo kuigawa
bahari na kuiamisha milima. Na katika uweza huwo, huweza kuligawa jaribu lako
lililo bahari nawe ukavuka salama huku adui zako wakimezwa na bahari hiyo ama
kuiamisha hiyo milima iliyo mbele yako.
Wewe
usiwatazame wanadamu bali mtazame Yesu aliyemgawa bahari, Ni kweli madakitari
wamesema hutapona ila YESU anasema hakuna lisilowezekana kwake.
Ni kweli kwenu hakuna aliyesoma hadi kidato
cha nne na wewe unataka kuchukuwa Dikrii, (Shahada). Sika Neno la BWANA kwa
kinywa changu, “Nitafanya njia pasipokuwa na njia, na mito ya maji huko jangwai
na nyikani”
Ni
kweli ndoa yako haina amani, huyu YESU aliyetuliza dhoruba baharini na kukawa
shwari kuu, anaweza kutuliza hiyo migogoro kwenye ndoa yako, Mathayo
8:23-27, 26 Akawaammbia “mbona mmekuwa waoga, enyi wa Imani haba? Mara akaondoka akazikemea pepo na bahari, kukawa shwari kuu.”
Na
wewe usiwe Muoga, Omba kwa Imani na muite Yesu kama mtuliza bahari ili atulize
hayo mawimbi kwenye ndoa yako. Kwake Yeye hakuna Neno la kumshinda maana jina
lake ni Alufa na Omega, yaani mwanzo na mwisho kwa kifupi ni bingwa wa
yaliyoshindikana.
2. Kukosa maji pale Masa, Tutazame tukio jingine la kukusosa
maji, na yamkini shida yako ni kukosa Chakula ama Mavazi au Ada ya shule, wewe
mtazame Yesu aliye wapa Mana wanaye na maji kule jangwani atatenda na kwako
pia.
Kutoka
17:1-7, Utaona jinsi Bwana alivyo watendea watu wake kwa kuwapa maji mara baada
ya Musa kupiga mwamba wa Horebu na mara maji yakatoka na wana wa Mungu
wakanywa, kumbuka walikuwa jangwani na wewe hayo maisha magumu ni taswira ya
jangwa rohoni.
Ni maombi
yangu kwa Mungu ayafanye hayo kwako halisi leo na afunguwe madirisha ya
mbinguni kwa ajili yako kama alivyofanya huko jangwani, (Zaburi 78:23 Lakini aliyaamuru mawingu juu, akaifungua milango ya
mbinguni; 24 akawanyeshea mana ili wale, akawapa nafaka ya mbinguni. 25Mwanadamu akala chakula cha mashujaa; aliwapelekea chakula cha kuwashibisha.)
3.
Goliati, Mfano mwingine ni ule wa Goliati,
kumbuka kuwa huyu alikuwa ni shujaa wa jeshi hasimu la Wafilisti na alikuwa
tishio kimwili na kiroho pia, ila Mungu alimuinua Daudi kwa ajili ya kusudi
hili takatifu nyakati zile. 1Samweli 17:40-50.
Ukipata muda soma sura yote.
Mungu huyu
aliyefanya haya kwa wanae kipindi hicho atafanya na kwako leo kwani yakupasa
kumtazama Bwana ili akuinuliye Daudi wako atakayemsambaratisha Goliati aliye
mbele yako. Yamkini Goliati wako ni hilo jaribu la kukosa kodi, ama biashara
kuwa ngumu, punguza kuwaza bali inua macho msalabani na hapo utapa nguvu kama
Daudi za kuchukuwa kombeo na jiwe kisha utamuangamiza huyu adui na kwa jiwe la
kombeo utashinda.
Tuone haya
maandiko kwenye 1Samweli 17:50, “Basi hivyo Daudi akamshinda yule Mfiliti
kwa kombeo na jiwe, akampiga Mfilisti, akamua, ..”
Na wewe
katika hilo hitaji lako ni hakika Mungu atakupigania ila lilo la msingi ni wewe
kumtazama Yeye na kuweka imani yako kwake na ukishaomba amini tayari amekwisha
kutenda.
“Marko
11:24 Kwa sababu hiyo nawaambia: Myaombayo mkisali, aminini ya kwamba mnayapokea,
nayo yatakuwa yenu.”
Anza sasa
kuingia kwenye maombi ya kumpiga Goliati wako, ama kumuomba Mungu akuinuliye
Daudi wako, ama ya kuigawa bahari iliyombele yako au kumuita Yesu kama mtuliza
bahari. Au anza yale ya kuamisha milima iliyo mbele yako; na yaombe kwa Imani.
Marko 11: 23 Amin,nawaambia:
Yeyote atakayeuambia mlima huu,
Ng’oka
ukatupwe baharini, wala asione shaka moyoni mwake, ila aamini kwamba hayo
asemayo yametukia, yatakuwa yake.
Na Huduma ya
UKOMBOZI GOSPLE, Arusha Tanzania, Kwa maombi, Ushauri, Maswali au Sadaka
wasiliana nasi, Barua pepe: ukombozigosple@gmail.com Simu: +255 759 859 287 pia waweza
itumia kwa M-PESA. Zaidi www.ukombozigosple.blogspot.com
Hakuna maoni:
Chapisha Maoni